Віват, першакурснік-2016! Віват, БарДУ!

Традыцыйнае свята прысвячэння ў студэнты, якое было падрыхтавана рэжысёрска-пастановачнай групай аддзела культуры і творчасці, з поспехам прайшло 1 верасня ў канцэртна-актавай зале ўніверсітэта і стала сапраўдным падарункам для дванаццатага пакалення першакурснікаў.

Шмат добрых слоў з пажаданнямі ў гэты ўрачысты дзень пачулі першакурснікі ад ганаровых гасцей свята, сярод якіх былі кіраўнік справамі Баранавіцкага гарадскога выканаўчага камітэта А.М.Сямашка, выконваючы абавязкі першага сакратара Баранавіцкага гарадскога камітэта БРСМ В.В.Горбач, вядомы кампазітар Беларусі, аўтар гімна БарДУ Ф.М.Жыляк, прадстаўнікі духавенства В.В.Лазоўскі і Б.А.Крыньскі, рэктар Латвійскага сельскагаспадарчага ўніверсітэта спадарыня Ірына Пілверэ.

Па традыцыі рэктар універсітэта В.І.Качурка і першы прарэктар Т.Р.Якубовіч уручылі першакурснікам сімвалічны Ключ ад ведаў і Заліковую кніжку з высокімі баламі, а адна з лепшых выпускніц 2016 года Крысціна Кобрын перадала першакурснікам сімвалічны «Пуд солі».

Займальны тэатралізаваны абрад прысвячэння першакурснікаў у студэнты правялі ўдзельнікі народнага маладзёжнага тэатра мініяцюр «Сафіт». Яркім завяршэннем святочнага мерапрыемства стаў канцэрт калектываў мастацкай творчасці, у якім прынялі ўдзел народная студыя эстраднай песні «Талент», студыя мастацкага чытання «Дзеяслоў», народны інструментальны ансамбль «Музычны гасцінец», харэаграфічны калектыў «Імпрэза».

2016-09-05

САЙТЫ СТРУКТУРНЫХ ПАДРАЗДЗЯЛЕННЯЎ