У нядзелю, 4 верасня, у сталіцы прайшоў Мінскі паўмарафон

У гэты раз у ім прынялі ўдзел больш за 20 тысяч бегуноў. Разам з прафесійнымі спартсменамі, сярод якіх, дарэчы, марафонцы з сусветнымі імёнамі, беглі чыноўнікі, вядомыя медыяперсоны, студэнты ўніверсітэтаў, прадстаўнікі спартыўных клубаў і проста аматары бегу.

Бюджэт прызавога фонду склаў 25 тысяч долараў.

Удзельнікі паўмарафона беглі тры дыстанцыі: 5,5, 10,55 і 21,097 км. Папярэднія вынікі паўмарафона: дыстанцыю ў 10 км першым пераадолеў удзельнік з Латвіі, а 21,097 км хутчэй за ўсіх прабег кеніец з вынікам у 1.03. Гэта новы рэкорд Мінскага паўмарафона. Беларуска Вольга Мазуронак выйграла паўмарафон, прабегшы дыстанцыю ў 21,097 км з вынікам 1 гадзіна 11 хвілін 44 секунды. Гэта рэкорд Мінскага паўмарафон сярод жанчын. Другой стала беларуска Ніна Савіна: яе вынік - 1 гадзіна 11 хвілін 50 секунд. Трэцяе месца ў жанчын - у кенійкі Stellah Jepngetich Barsosio (1 гадзіна 12 хвілін 48 секунд).

Траса ў дэбютны год атрымала 5 зорак (максімум) па сістэме ацэнкі якасці забегаў Еўрапейскай лёгкаатлетычнай асацыяцыі. Гэта значыць, што вынікі, зафіксаваныя на ёй, будуць прызнаныя ва ўсім свеце, дакладвае старшыня Беларускай федэрацыі лёгкай атлетыкі Вадзім Дзевятоўскі. Паводле яго слоў, на гэтым паўмарафоне могуць быць выкананы алімпійскія нарматывы, а таксама ўстаноўлены сусветны рэкорд «на палоўцы».

У гэтым годзе ўдзел прынялі больш за 20 тысяч бегуноў. Толькі на трасу ў 21,097 км зарэгістраваліся больш за 1,5 тысячы ўдзельнікаў. 650 жадаючых прабегчы паўмарафон у Мінску - прадстаўнікі 42 краін, у асноўным краін блізкага замежжа: Украіны, Расіі, Прыбалтыкі. Аднак зарэгістраваліся бегуны нават з Японіі і Коста-Рыкі! З беларускіх вядомых персон паўмарафон беглі міністр спорту і турызму Аляксандр Шамко, яго намеснік Аляксандр Дубкоўскі, міністр адукацыі Міхаіл Жураўкоў (ужо другі раз), Максім Ермаловіч - першы намеснік міністра фінансаў, прэс-сакратар прэзідэнта Наталля Эйсмант, спявачка Ірына Відава, а таксама Вадзім Дзевятоўскі і першы віцэ-прэзідэнт НАК Максім Рыжанкоў.

Удзел у Мінскім паўмарафоне прыняла каманда нашага ўніверсітэта на чале з начальнікам спартыўнага клуба Шайко Аляксандрам Іванавічам і студэнты: Пратасюк Анастасія, гр.ФК-21, Лахаюк Юлія, гр.ФК-11, Амяляшчык Вадзім, гр. НФ-51, Мамацюк Яна, гр. НФ-51, Буд-Гусаім Алена, гр. НФ-51, Ляшкевіч Міхаіл, гр. НФ-51, Пракапенка Вікторыя, гр.ФК-11, Вішнеўскі Дзяніс, гр.ТМ-41, Стралец Ірына, гр. Ас-31, Мякіннікава Ларыса, гр.М-31, Кіцун Сяргей, гр. ІСТ-42. Наша каманда бегла дыстанцыю 5,5 км, а Вішнеўскі Дзяніс пераадолеў паўмарафонскую дыстанцыю 21,097 км.

Усе  ўдзельнікі, якія фінішавалі, былі ўзнагароджаны медалямі.

2016-09-07

САЙТЫ СТРУКТУРНЫХ ПАДРАЗДЗЯЛЕННЯЎ